Шымкент қаласында Мәдениет саласының үздігі, сазгер әрі журналист Бекжігіт Сердәлінің «Жапырақтар вальсі» атты шығармашылық кеші өтті. Ұлттық өнер мен заманауи музыканы үйлестірген бұл кеш миллионды қаланың тыңдармандарын ерекше әсерге бөлеп, өнерсүйер қауымға көңілді кеш сыйлады.

Кеш барысында сазгердің өнеріне құрмет білдіріп Қазақстан Республикасының Мәдениет қайраткері, дәстүрлі әнші Абылайхан Оспанов және көптенен танымал өнер адамдары ән шырқады.

Дәстүрлі әнші Абылайхан Оспанов, Бекжігіт Сердәлінің әндері қарапайымдылығымен халыққа тез жететінін, шынайылығының жүрекке жақын екенін атап өтті.

- «Неге? Неге?», «Ерке қайың», «Текемет» секілді шығармалар халық жүрегінен орын алып, әр тыңдарманның көңілінен орын алуда. Сондай-ақ кештің шымылдығын Талап Қалмырзаевтің сөзіне жазылған «Текемет» әнімен ашамын. Бұл шығармалар өміршең. Өйткені әннің әуені мен сөзі үйлесім тапқан туынды,- деді Абылайхан Оспанов.

Шығармашылық кеш иесі, сазгер Бекжігіт Сердәлі Шымкент жұртына деген ризашылығын білдірді. Ол ұзақ уақыт бойы мегаполис тұрғындарына жеке концерт беруді жоспарлағанын айтты.

— «Бұл қалада алғаш рет үлкен жеке концертімді беріп отырмын. Шымкенттің жастарына, студенттеріне арнап, кешті «Жапырақтар вальсі» деп атадық. Жапырақтың талдан үзіліп, баяу тербеле жерге түсуі – әуеннің нәзіктігін, музыка әлеміндегі үйлесімдікті білдіреді. Ал вальс – біздің көрермендерімізге деген ықылас. Әрбір тыңдарманымыз әндерімізбен бірге тербеліп, билеп, рухани ләззат алса дейміз», – деді сазгер.

Кеш барысында автордың танымал әндерімен қатар жаңа әндері де көпшілік назарына ұсынылды. Бекжігіт Сердәлінің айтуынша, репертуардың 70 пайызы – тыңдарманға бұрын жарияланбаған жаңа туындылар.

Айта кету керек, Бекжігіт Сердәлі есімі тек түстік өңіріне ғана емес, күллі қазақ халқына жақсы таныс. Ол – сазгерлігімен қатар ұстаздықты, журналистиканы серік еткен жан. Елге белгілі «Жас жұбайлар», «Түркістаным – Тұраным», «Неге? Неге?» секілді көптеген әндердің авторы. Сонымен бірге, қаламы ұшқыр журналист ретінде «Ұлт журналистикасының ұлықпаны», «Жорналшы жазбалары», «О махаббат» атты көркем-публицистикалық кітаптары жарық көріп, оқырман тарапынан жоғары баға алған.

«Шымкент келбеті»