Италия құрамасы пенальти сериясында Англия құрамасын жеңіп, футболдан Еуропа чемпионы атанды. Негізгі уақыт 1:1 есебімен аяқталып, екі қосымша таймда да гол соғылған жоқ, деп хабарлайды Shymkentaqparat тілшісі prosports сайтына сілтеме жасап

EURO-2020 финалы Лондонның Уэмбли стадионында 12 шілдеге қараған түні өтті.

Англия құрамасы Италия ұлттық құрамасына қарсы финалдық матчтің екінші минутында алға шықты. Италиялықтардың қақпасына голды Люк Шоу соқты. Бұл гол EURO-2020 финалы тарихындағы ең жылдамы болды.

Матчтің 67-минутында Италия құрамасының орталық қорғаушысы Леонардо Бонуччи Англия құрамасының қақпасына гол соғып, есепті теңестірді.

Матчтің негізгі уақытында есеп өзгерген жоқ. Құрамалар қосымша уақытта да ойын барысын өзгерте алмады. Матчтің нәтижесін пенальти сериясы шешті. EURO-2020 финалы матчтен кейінгі пенальтимен аяқталған жағдай тарихта осымен екінші рет болып отыр. Айта кетсек, бірінші рет 1976 жылы болған еді.

Пенальти сериясында италиялықтар қарсыластың қақпасына 3 гол соғып, чемпионаттағы жеңісінен 53 жыл өткен соң Еуропа чемпионы атанды.

Топтық кезеңде италиялықтар А квартетінде Түркияны (3:0), Швейцарияны (3:0) және Уэльсті (1:0) жеңып, тоғыз ұпай жинаған. 1/8 финалда олар қосымша уақытта Австрияны жеңді (2:1), ал келесі раундта Бельгиядан мықты болды (2:1). Пенальти сериясындағы жартылай финалда италиялықтар Испанияны жеңді.

Ойын соңында EURO-2020 үздік ойыншысы атағы Италия қақпашысы Джанлуиджи Доннаруммаға берілді.