ҚАЛА ӘКІМДІГІНІҢ РЕСМИ ӨКІЛІ БРИФИНГ ӨТКІЗДІ
Өңірлік коммуникациялар орталығында Шымкент қаласы әкімінің орынбасары Сәрсен Құранбек БАҚ өкілдеріне шаһардың әлеуметтік-экономикалық дамуына қатысты өзекті сауалдарға жауап берді. Сондай-ақ алдағы уақытта қала әкімдігі мұндай кездесуді тұрақты өткізіп тұрмақ. Бұл үшін әкім орынбасары өз міндетінен бөлек ресми өкіл ретінде халықты толғандырған мәселелерге байланысты апта сайын әкімдіктің атқарған жұмысы жайында құлақдар етіп отыратын болады.
Шымкент қаласы – еліміздегі қарқынды дамып келе жатқан үш мегаполистің бірі. Бұл орайда шаһар республиканың әлеуметтік-экономикалық, мәдени және рухани дамуында маңызды рөл атқарады. Сондықтан қала тұрғындарының әл-ауқатын жақсартуға бағытталған ауқымды іс-шаралар тұрақты әрі жоспарлы түрде жүзеге асырылып келеді.
Әкімдік Мемлекет басшысы Қасым-Жомарт Тоқаевтың Жолдауында айтылған тапсырмалардың тұрақты негізде орындалып, халықтың тұрмыс сапасын жақсарту мен рухани-мәдени мұрасын қалыптастыруда жүйелі жұмыстар атқаруға аса ден қойып отыр. Соның ішінде қала тұрғындарының өмір сүру сапасын жақсарту, әлеуметтік жағдайын көтеру, білім мен мәдениет саласын дамыту – басты басымдықтың бірі. Осылай деген Сәрсен Абайұлы шаһардың әлеуметтік қамсыздандыру, білім беру, денсаулық сақтау, руханият пен өнер саласында ауқымды жұмыстарға тоқталып, алдағы мерекелерге дайындық барысын да баяндады.
Оның айтуынша, былтыр әкімдік барлық салада межеленген нәтижеге қол жеткізген. Айталық, халықтың әлеуметтік ахуалын арттыруға байланысты көрсеткіштерде оң динамикалық өсім қалыптасып отыр. Мәселен былтыр тартылған инвестиция - 12, құрылыс жұмыстары - 14, пайдалануға берілген тұрғын үй алаңы - 26, сауда көлемі - 20, көлік қызметі - 27, өнеркәсіптегі өнім көлемі 3 пайызға артқан.
Өңірдегі «Халықтың табысын арттыру бағдарламасы» да өз деңгейінде жүргізіліп келеді екен. Былтыр жұмыспен қамту шараларына 58 мыңнан астам адам қатысып, 40 мыңға жуық адам тұрақты жұмыспен қамтылыпты. Өйткені экономикалық көрсеткіштердің өсімі халықтың өмір сапасына тікелей әсер етуге тиіс. Бұл ретте өңірдегі жалақыны арттыру мақсатында жергілікті бюджеттен 11 млрд теңге бөлінсе, 15 мыңнан астам еңбекақысы төмен азаматтық қызметшінің жалақысын қосымша 50 мың теңгеге өсірілген. Нәтижесінде жергілікті бюджеттен қаржыландырылатын барлық бюджеттік қызметкерлердің жалақысы 154 мың теңгеден асып отыр.
«Әлеуметтік салада да бірқатар ірі нысандар бой көтерді. «Жайлы мектеп» ұлттық жобасы аясында 15 800 орындық 11 мектеп пайдалануға берілді. Президент тапсырмасына сәйкес жергілікті бюджет есебінен заманауи талаптарға сәйкес келетін, әрқайсысы 500 орындық екі Оқушылар сарайын іске қостық», дейді ол. Осы орайда Сәрсен Абайұлы БАҚ беттерінде талқыланған №8 мектеп маңындағы сауна туралы ақпаратқа байланысты атқарылған шараға тоқталды. Оның сөзінше, бұл ақпаратқа байланысты тиісті шара қабылданып, тергеу жүріп жатыр. Қазір Полиция департаментінің өндірісінде Қылмыстық кодекстің 309-бабы 2-бөлігі 1-тармағымен жезөкшелікпен айналысу үшін притон ұйымдастыру және оны ұстау, жеңгетайлық фактісімен тіркелген қылмыстық іс тергеліп жатыр. Бұл мекенжайларда жүргізілген тінту шаралары барысында Тәуке хан даңғылы, 60/7-үйде орналасқан 32 пәтердің барлығы монша және қонақүй кешені ретінде қайта жабдықталғаны және онда интимдік қызметтер көрсетілгені анықталған. Қылмыстық іс аясында сауна қызметкерлері күдікті деп танылып, үшеуі қамауға алынды. Ал жуырда ГАСК басқармасы, СЭС, Оңтүстік Жарық Транзит және ТЖД қызметкерлерінің қатысуымен де кешенді тексеру жүргізіліп, құқық бұзушылық болғаны анықталған. Осыған байланысты «Арман-1» саунасының қызметі тоқтатылып, нысан мөрленген. Қазір тиісті хаттама толтырылып, сотқа жолданыпты.
Ресми өкілдің сөзіне сүйенсек, қалада халықаралық деңгейдегі көпфункционалды 2 066 орындық Конгресс холл пайдалануға берілсе, шаһардың орталығынан шалғай орналасқан 4 елді мекенде жаңа мәдениет үйлері ашылды. Дәл осындай мәдениет және спорт орталықтары биыл 5 елді мекенде салынбақ. Бұған қоса, халықаралық деңгейдегі 35 мың орындық заманауи жаңа стадион құрылысы басталған. Ал былтыр жергілікті бюджет есебінен 1 750 балаға арналған 2 спорт ғимараты және жеке инвестиция есебінен 1 000 адамға арналған спорт кешені, 500 адамдық шағын футбол орталығы пайдалануға берілген. Сондай-ақ былтыр денсаулық сақтау саласында 3 жекеменшік медициналық орталық іске қосылса, қазір де бюджет есебінен 2 ауруханада күрделі жөндеу жұмыстары жүргізіліп жатыр. Мұқтаж азаматтарға арналған заманауи үлгідегі 150 орындық оңалту орталығының құрылысы да басталған. Қосымша әкімдік жоспарында паралимпиада және сурдлимпиада спорт түрлеріне арналған арнайы орталық салу қарастырылып отырғаны мәлім етілді.
Сәрсен Абайұлы 8-наурыз – Халықаралық әйелдер күні мен Ұлыстың ұлы күніне орай ұйымдастырылатын шараларға да тоқталды. Оның айтуынша, биыл да қос мереке кең көлемде атап өтіледі. Шымкент қаласы мәслихатының шешіміне сәйкес, 8 наурыз – Халықаралық әйелдер күніне орай «Алтын» және «Күміс» алқа иегерлері, «Батыр ана» атағын алған, І және ІІ дәрежелі «Ана даңқы» ордендерімен наградталған аналарға 5 АЕК мөлшерінде бір реттік әлеуметтік төлем жасалмақ. Ал Наурыз мейрамын «Наурызнама» онкүндігі аясында атап өтіледі.
Жадыра МҮСІЛІМ,
«Шымкент келбеті»
