5-ші Дүниежүзілік көшпенділер ойындары аясында қалада спорт мектептері арасында отбасылық эстафета сайысы ұйымдастырылды. Жеңілатлетикалық манежде өткен сайыста жалпы 20 отбасы бақ сынады. Бұл жолғы сайыстың жөні бөлек.

Бокстан ХДСШ, қалалық №1спорт мектебі директорының орынбасары Қанат Орақбаев жарысты ашып беріп, қатысушыларға сәттілік тіледі.

Аталған сайыс Дүниежүзілік көшпенділер ойындарын насихаттау, спорт мектептерінің қызметкерлері арасында саламатты өмір салтын қалыптастыру, бұқаралық спортты дамытуды мақсат еткен.

Командалар 5 кезең бойынша – отбасылық эстафета, ұзындыққа секіру және тағы басқа бағдарламалар бойынша бақ сынады. Отбасылық эстафета сайысының жеңімпаз және жүлдегерлері бағалы сыйлықтар, медальдар және кубоктармен марапатталды.

Айта кетсек, шаһарда 5-ші Дүниежүзілік көшпенділер ойындары аясында тоғызқұмалақ, теңге ілу, арқан тарту, тағы басқа ұлттық спорт түрлерінен сайыстар өтті.

«Шымкент келбеті»