Бүгін, 15 қаңтарда Мемлекет басшысы Қасым-Жомарт Тоқаевтың қатысуымен ҚР Парламентінің жетінші шақырылымының бірінші сессиясы өтіп жатыр. Сайлауда дауыс берудің жаңа тәртібін енгізу туралы Президент пікірін Баспасөз хатшысы Берік Уәли facebook парақшасында бөлісті, – деп хабарлайды shymkentaqparat.kz

«Біздің басты мақсатымыздың бірі – адам құқықтарын толық қорғау. Бұл ретте, азаматтардың таңдау еркіндігін барынша қамтамасыз ету өте маңызды. Әлемдік тәжірибеде адамның қандай да бір сайлауға келіспейтінін немесе үміткерлердің бәріне қарсы екенін заңды түрде білдіру құқығы кеңінен қалыптасқан. Шын мәнінде, баламалы пікір және бәріне қарсы дауыс беру ұғымы біз үшін де қалыпты нәрсе болуға тиіс. Сондықтан, барлық деңгейдегі сайлау бюллетендеріне «бәріне қарсымын» деген жазу енгізген жөн. Бұл бастама азаматтардың сайлау құқығын қорғауға жағдай жасайды. Таңдауы жоқтығын ресми көрсетудің өзі таңдау емес пе?!», – деп Қазақстан Президенті Қасым-Жомарт Тоқаев VII шақырылымдағы Парламенттің бірінші сессиясының ашылуында сөйлеген сөзінде атап өтті.