Әдебиет – ұлттың жаны. Ал қаламгер – сол жанның үні. Шымкент қаласы әкімдігінің қолдауымен өткен «Заман және қаламгер» атты шығармашылық кездесу осы сөздің айғағындай әсер қалдырды.

Қаладағы Жастар ресурстық орталығында өткен әдеби басқосу шымкенттік ақын-жазушылар мен оқырман қауымды рухани ортада тоғыстырды. Іс-шараның басты мақсаты – қалам ұстаған азаматтардың еңбегін дәріптеу, әдебиет арқылы қоғамның рухани әлеуетін арттыру және жас ұрпақты кітап оқуға баулу.

Кешке қала әкімінің орынбасары Сәрсен Құранбек, Қазақстан Жазушылар одағының хатшысы Қасымхан Бегман, Шымкент қалалық мәслихатының төрағасы Бахадыр Нарымбетов қатысып, сөз өнерін серік еткен жандарға ізгі тілектерін арнады.

– Қала әкімдігі әдебиет пен мәдениетке ерекше көңіл бөліп келеді. “Абай оқулары”, “Кітап оқитын ұлт” сияқты жобалар – руханиятқа салынған инвестиция. Егер кітап шынайы жүректен туса, тілі шұрайлы болса, ол өз оқырманын міндетті түрде табады. Біз сапалы шығармашылықты қолдауға әрдайым дайынбыз, - деді Сәрсен Абайұлы өз сөзінде әдебиеттің қоғамдағы орнын айта келіп.

Кеш барысында қаламгерлердің жаңа туындылары таныстырылды. Атап айтқанда, Момбек Әбдіәкімұлының «Сыр шерткен өткеннен» атты естеліктер жинағын, Фатима Забурқызының «Тасжүрек» атты әңгімелер топтамасы мен Айгүл Қалтайқызының «Із» атты өлеңдер жинағын оқырман назарына ұсынды.

Әдебиет пен заман тақырыбы төңірегінде өрбіген пікірталас еркін әрі шынайы өрнек тапты. Қаламгерлер бүгінгі қоғамдағы сөздің салмағы, жазушының жауапкершілігі мен жаңа заман талабындағы әдеби үрдістер жайында ой бөлісті. Қазақстан Жазушылар одағының Шымкент қалалық филиалының төрағасы Момбек Әбдіәкімұлы кешті жүргізіп отырды.

– Әдебиет – өркениеттен бұрын туған киелі өнер. Тілді жасаушы да, ұлттың рухын сақтаушы да – қаламгер. Тілсіз халық – тамырсыз ағаш секілді. Сол себепті жазушы – қоғамның айнасы. Бүгінгі жиында сол айна жарқырап көрінді, – деді Момбек Әбдіәкімұлы.

Кеш соңында әдебиет әлеміне үлес қосып жүрген бірқатар ақын-жазушыларға қала әкімінің алғыс хаттары мен естелік сыйлықтар табыс етілді. Сонымен қатар, жергілікті авторлардың кітаптарынан құралған кітап көрмесі көпшіліктің қызығушылығын тудырды.

«Заман және қаламгер» – жай ғана кездесу емес, бұл руханияттың жаңа тынысы іспетті шара болды. Онда әр сөздің, әр ойдың артында елдің рухы, ұлттың болашағы тұрғаны сезілді. Әдебиет арқылы қоғамның ең ізгі қасиеттері – бірлік, парасат берілетіні, кітап оқу арқылы бүтін қоғам тәрбиеленетінін ескерсек, бұл жиынның маңызы зор болды.

Бүгінгі басқосу – сөз өнерін құрметтейтін, руханиятты өмір салтына айналдырған қаланың айнасы. Әдебиет ешқашан өлмейді, өйткені ол – адамның жүрегінде, қалам ұшында, замана үнінде мәңгі сақталады.

Шын мәнінде, әкімі ақынын, халқы қаламгерін іздеген ел бақытты. Өйткені ондай қоғамда руханияттың тамыры терең, сөздің қадірі биік, ал ұлттың болашағы жарқын болмақ.

«Шымкент келбеті»