«Қазгидромед» еліміздің ауа райына байланысты он өңірде дабылды ескерту жариялады, деп хабарлайды Shymkentaqparat тілшісі

28 маусымда Алматы облысында күндіз кей жерде өткінші жаңбыр, найзағай, бұршақ жауады. Солтүстік-шығыстан соққан желдің екпіні 15-20 м/с-ке жетеді.

Батыс Қазақстан облысында найзағай, бұршақ болады. Күндіз кей жерде 42 градусқа аптап ыстық күтіледі, төтенше өрт қаупі сақталады.

Қостанай облысының оңтүстігінде 36 градусқа дейін қатты ыстық болады, өрт қауіптілігінің төтенше деңгейі күтіледі.

Павлодар облысының кей жерінде найзағай ойнап, батыстан, солтүстік-батыстан жел соғады. Найзағай кезінде екпіні 15-20 метрге жетеді.

Ақтөбе облысында күндіз кей жерінде найзағай ойнайды, солтүстік, солтүстік-батыстан жел соғады. 38 градусқа аптап ыстық болады. Жоғары өрт қаупі сақталады.

Ақмола облысының кей жерінде найзағай күтілсе, Қарағанды облысында 28-29 маусымда кей жерде күн 35-38 градусқа дейін ыстық болады. Кей жерде өте жоғары өрт каупі сақталады.

28-29 маусымда Атырау облысының оңтүстігінде 42 градус аптап ыстық сақталады. Жоғары өрт қаупі күтіледі.

28 маусымда күндіз Қызылорда облысында 40-42 градус қатты ыстық күтіледі және өте жоғары өрт қаупі сақталады.

28-30 маусымда Жамбыл облысының таулы және тау бөктерінде найзағай, бұршақ күтіледі. Солтүстік-шығыстан 15-20 метрге дейін жел соғады. Облыстың басым бөлігінде 38 градусқа дейін аптап болады, төтенше өрт қаупі күтіледі.