Биыл мегаполисте білім саласында 21 жаңа құрылыс, 11 қосымша құрылыс жұмыстары атқарылады, деп хабарлайды Shymkentaqparat

Оның ішінде 13 нысанның құрылысы мемлекет есебінен, 19-ы жеке инвесторлар көмегімен бой көтермек.

Мұрат Дүйсенбекұлы Сайрам тұрғын алабында орналасқан бастауыш он сыныпқа арналған, 120 орындық қосымша құрылыстың барысымен танысты.

Жобаның жалпықұны – 936,1 млн теңгені құраса, бас мердігер «АРТ – Құрылыс» ЖШС өткен жылы 330,0 млн теңгені игерген. Құрылыс өткенжылдың наурыз айында басталған болатын.

2021 жылға қаралған қаржы – 606,1 млн теңге. Мердігер компания құрылысты биыл шілде айында аяқтауды жоспарлап отыр. Бүгінде жер жұмыстары, бетон асты табаны, ірге тас, сыртқы инженерлік желілер, т.б., жұмыстар 100 пайыз орындалды.

– Құрылысты сапалы жүргізуде халықаралық стандарттарды үйрену – заман талабы. Мектеп ауласын толық асфальттау, газон, тас төсеніш төсеу және спорт залдың желдету жүйесіне аса көңіл бөлу қажет. Құрылыс алаңына кіріп-шығып жүрген техникалардың да тазалығына мән беру керек, – деді қала әкімі.

Қала әкімі мердігер мекеме басшыларына мектеп аумағының абаттандырылуына, газон, тас төсеніш төсеуге жіті мән беру керектігін міндеттеді.

Сондай-ақ, шаһар басшысы құрылысты аралау барысында жергілікті тұрғындармен кездесіп, мердігердің жұмысты сапалы атқаруын бірлесе бақылауға шақырды.