Қазақстанда 2022 жылы 2-14 жас аралығындағы балалар «Кидс гоу фри» бағдарламасы арқылы әуе билеттерін тегін ала алады, деп хабарлайды Shymkentaqparat

Бұл жөнінде Kazakh Tourism ҰК АҚ басқарма төрағасы Ержан Еркінбаев баспасөз брифингте мәлімдеген.

«Кидс гоу фри» (Балалар тегін саяхаттайды) бағдарламасы қазақстандықтарды еліміздің туристік орындарына отбасымен саяхаттауды ынталандыру мақсат еткен. Бағдарлама балаларға арналған әуе билеттерін субсидиялау негізінде жүзеге асырылады. Сондай –ақ, мұндай турпакетін кез келген туроператордан сатып алуға болады.

– Неліктен әуе рейстері субсидияланады? Қазақстандықтар өз балаларына еліміздің басқа да өңірлерін тамашалап, көрсетуі үшін субсидия беріледі. Бізде әдемі ландшафтар көп -13 ұлттық саябақ бар. Көпшілігіміз өз өңірімізден тыс жерлерге шықпадық. Бұл жақсы мүмкіндік болады, сондықтан бұл бағдарламаны туыстарының үйіне қыдырумен салыстыруға болмайды деп санаймын, - деді Ержан Еркінбаев өз мәлімдемесінде.

Айта кетсек, саяхатқа туроператордың қызметін қолданбай өз бетінше ұшатын отбасы балаларының билет құны субсидияланбайды.