Шымкентте 123 эвакуациялық пункт ұйымдастырылған. Олар көп қабатты үйлер мен халық тығыз орналасқан елді мекендерде орналасқан. Сейсмикалық қауіпсіздік мәселелері ескеріле келе жинау пункті ретінде мектептер таңдап алынған.
Бүгін сондай орынның бірі – Ы.Алтынсарин атындағы №65 мектеп-гимназияның базасында орналасқан 31-эвакуациялық жинау пунктінде төтенше жағдай кезіндегі іс-қимылдарды пысықтауға арналған практикалық жаттығу өтті. Іс-шараға Шымкент қаласы ТЖ департаментінің, қалалық 21 азаматтық қорғау қызметінің өкілдері және мектеп мұғалімдері мен тұрғындар қатысты.
– Бүгінгі оқу-жаттығу барысында департамент мамандары апатты жағдайда қауіпсіз аймаққа жиналу жолдары түсіндірілді, арнайы жасақталған топтардың жұмысы тұрғындарға тәжірибе жүзінде көрсетілді. Жалаы, Шымкенттегі мектептердің негізінде құрылған барлық эвакуациялық-жиналу пунктерінің жұмысын пысықтау жұмыстары бекітілген жоспарға сәйкес өткізіліп тұрады, – деді Шымкент қалалық ТЖД Азаматтық қорғаныс басқармасының бастығы Нұржан Қаракөзов.
Айта кетейік, табиғи және техногенді сипаттағы төтенше жағдай туындаған кезде немесе қала тұрғындарын эвакуациялау қажеттігі туындағандағы дайындық жұмыстары Шымкент қалалық төтенше жағдайлар департаментінің үнемі бақылауында тұрады.
