Жаңа жылдық мереке қарсаңында Шымкент қалалық қуыршақ және жасөспірімдер театры «Қуыршақтар карнавалын» ұйымдастырды. Бүлдіршіндерді адалдыққа, мейірімділікке, еңбекке, көпшіл болуға баулып, театр өнерін насихаттау мақсатында ұйымдастырылған шеру «Арбат» алаңында өтті.

Бүтін бір қойылым ретінде ұйымдастырылған карнавалда бүлдіршіндер ертегілер еліне саяхат жасады. Балақайлармен бірге ертегі кейіпкерлері өзге елдердің Жаңа жылды тойлау дәстүрімен таныстырып, қызықты ақпараттармен бөлісті. Қуыршақтар карнавалы жол-жөнекей түрлі кейіпкерлер мен жан-жануарларға жолығып, викториналық сұрақтар мен ойындардан құрылған жолдағы сан түрлі кедергілерден мүдірмей өтіп, жақсы мен жаманды айыра білуді, ешкімді алдамай, әрдайым шындықты айтуды, достыққа адал болуды үйретті.

Ертегі кейіпкерлерімен бірге қызықты ойындарға қатысқан балақайлар осылайша көтеріңкі көңіл күймен ертегілер еліне саяхаттады. Сондай-ақ, іс шара барысында кішкентай көрермендерге ойын-сауық бағдарламалары ұсынылды. Бразилия карнавалы, роликті және жарық киімдегі кейіпкерлер, түрлі көлемдегі қуыршақтар Аяз ата мен Ақшақарды ортаға алып, Жаңа жыл мерекесімен құттықтады.