Қала әкімі Мұрат Әйтенов «Шаңырақ» шағын ауданында болып, тұрғындардың емхана мен жер мәселесі туралы өтініштерін тыңдады, деп хабарлайды Shymkentaqparat

Шаһар басшысы тұрғындардың өмір сүруіне қолайлы жағдай жасау мақсатында қалада кезең-кезеңімен жүйелі жұмыстар атқарылып келетінін атап өтті. 2023 жылға дейін халық 100 % сапалы ауыз сумен, 100% табиғи газбен, 2025 жылға дейін 100% сапалы электр қуатымен қамтылады.

Кешегі берген халық алдындағы есепті кездесуімде де қала тұрғындарының алдында тұрған 5 ортақ мақсат жөнінде айтып өткен болатынмын. Ол адами капиталды өсіру, инфрақұрылымды дамыту, кәсіпкерлікті қолдау, баспаналы болу, халыққа қолайлы қала құру. Осы бағыттағы жұмыстарды жүзеге асыруда бірлесе жұмыс жасауымыз қажет, - деді.

Сайрам ауданынан Шымкент қаласы Еңбекші ауданының аумағына өткен елді мекенге қала мәслихатының шешімімен «Шаңырақ» шағын ауданы атауы берілген болатын. Бүгінде мұнда 2 мыңға жуық халық тұрады. Шағын ауданда 1 мектеп пен 2 жекеменшік балабақша бар. Ал 10,91 шақырым жолдың қәзіргі таңда 6,85 шақырымы асфальт жол болса, 4,06 шақырымы шағал тас төселген жолдар.