Шымкент қаласының әкімі Мұрат Әйтенов Оңтүстік Қазақстан мемлекеттік педагогикалық университетінде болып, №1 Студенттер үйімен және ондағы үйірме орталығының жұмысымен танысты, деп хабарлайды Shymkentaqparat қала әкімдігінің баспасөз қызметіне сілтеме жасап
Шаһар басшысы университеттің бас ғимаратында орналасқан «Ұлы дала елі өркениеттер тоғысында» атты көрме залымен танысты. 1966 жылы құрылған археологиялық студенттер жасағы тапқан ірілі-ұсақты жәдігерлерден тұратын арнайы көрме залы б.з.д. 100 мың жыл – б.з. ХІІ ғ. аралығындағы ұлы дала өркениетінен, тарихтан сыр шертеді.
Тарих ғылымдарының докторы, танымал археолог Александр Подушкин студенттердің археологиялық жасағы жүргізген қазба жұмыстары кезінде табылған көне жәдігерлерді көрсетіп, олар туралы әңгімелеп берді.
Қала әкімі М.Әйтенов университеттегі Н.Назарбаев атындағы ғылыми-инновациялық кабинеттің жұмысын көрді. Кабинет жоғары технологияның ең соңғы үлгісі бойынша жабдықталған. Бұл жерде ғылыми жобамен айналысатын үздік студенттер және оқытушы-профессор құрамы жұмыс істеуіне толық мүмкіндік жасалынған. Сонымен бірге мұнда Елбасының 200-ден аса еңбектері жеке кітапхана ретінде де қызмет көрсетеді.
Мұрат Дүйсенбекұлы «Nur Otan» партиясының «ІТ мамандар дайындау» жобасы шеңберінде ашылған «IT-SYNYP» сыныбы мен «Робототехника» үйірмесінің жұмысымен де танысты.
8-16 жас аралығындағы сексен баланы оқытуға арналған «IT-SYNYP» компьютерлік сыныптарында оқушылар үш бағытта білім алады.
2018 жылдың маусым айынан 2020 наурыз айы аралығында IT-сыныпта 1 100 оқушы оқып, арнайы сертификатқа ие болды.
Сонымен бірге орталықта 11 үйірме бар. Студенттердің қолөнер бұйымдары арнайы көрме залына қойылған.
2015 жылы ашылған 12 қабаттық №1 Студенттер үйі барлық жағдай жасалған. Әр бөлмеде екі студенттен қоныстанған. Жанға жайлы. Тұрмыстық қажеттіліктің бәрі бар.
