Шымкенттегі Оңтүстік Қазақстан мемлекеттік педагогикалық университетінде студенттер мен жоғары оқу орыны мамандарына өрттен сақтанудың жолдары түсіндірілді. Студенттер үйі ғимаратында қалалық Төтенше жағдайлар департаменті №3 өрт сөндіру бөлімінің қызметкерлерімен бірлескен арнайы оқу-жаттығу сабағы ұйымдастырылды.

Өрт қауіпсіздігі туралы дабыл бойынша студенттер мен оқытушылар ұйымдасқан түрде ғимараттан жатақхана аумағына шықты. Төтеншеліктерге қызыл жалын ғимараттың 3 қабатында орын алғаны туралы хабарлама түскен.

Шартты өрт бар болғаны бірнеше минутта сөндірілді. Өрт сөндірушілер ғимаратқа жедел саты арқылы көтеріліп, ішінде қалып қойған адамдарды қауіпсіз орынға шығарды. Медициналық көмек қажет болғандарға жедел жәрдем қызметкерлері алғашқы көмекті көрсетті.

Оқу-жаттығу барысын бақылаған университеттің әкімшілік-шаруашылық бөлімінің басшысы Данияр Серікбаев оң баға беріп, құрылымдардың кәсібилігін, жеделдігін атап өтті.

Жалпы, тілсіз жаудан сақтанудың жолдары мен өрт қауіпсіздігі ережелерін түсіндіруге бағытталған оқу жаттығу сабағына 2 арнайы техника мен өрт сөндіру бөлімінің 14 жеке құрамы жұмылдырылды.