Шымкент гарнизонындағы 35748 әскери бөлімінің психолог-офицерлері мерзімді әскери қызметшілермен психологиялық тренингтер өткізуде, деп хабарлайды Shymkentaqparat

Шымкент гарнизонының баспасөз қызметінің мәліметінше, ең танымал тренингтік бағдарламалардың бірі – «команда құру» немесе «бірігуге бағытталған тренинг». Бұл күрделі психофизикалық жұмыс, онда команда мүшелері де, жаттықтырушының өзі де жұмыс істейді. Әлбетте, командада үйлесімді жұмыс істей білу – кез келген ұйымның табысты дамуы үшін маңызды.

Мұндай психологиялық тренингтер ұжымдық жұмыс кезінде адамның өзіне деген сенімділігін нығайтуға, тиімді қарым-қатынас орнатуға, өзін-өзі бақылау дағдыларын арттыруға және қалыпты емес жағдайларда топ шешімдерін тез қабылдауға мүмкіндік береді.

– Тренингтер әскери ұжымды біріктіруге, әскерилердің бір-біріне тек қызмет уақытында ғана емес, бейресми жағдайда да сенімін қалыптастыруға, психологиялық жүктемені азайтуға және әскери қызметке бейімделуді жақсартуға бағытталған. Сонымен қатар тренингтер арқылы сарбаздардың әскери қызметке деген дұрыс көзқарасын дамытуға, моральдық-психологиялық жағдайы мен әскери тәртібінің деңгейін арттыруға мүмкіндік береді, - дейді 35748 әскери бөлімінің психолог-офицері Айбек Қаратаев.

Айта кетейік, тиімді тренингтерден кейін мерзімді әскери қызметшілердің эмоционалды және моральдық-психологиялық ахуалында оң динамика байқалады, бұл олардың әскери қызметке тез бейімделуіне ықпал етеді.