Шымкентте жаңа «Фосфоршылар мәдениет сарайы» ғимаратының құрылысы басталды. Бүгін қала әкімі Ғабит Сыздықбеков пен «Сәби» қайырымдылық қорының негізін қалаушылар – эколог Әсел Тасмағамбетова және кәсіпкер Кеңес Рақышев маңызды нысанның құрылысы басталған жерге капсула салу рәсіміне қатысты.
Қаланың мәдени өмірінде ерекше орын алатын бұл орталық 1980 жылы пайдалануға берілген. Алайда соңғы жылдары ғимарат қараусыз қалып, 2023 жылы коммуналдық меншікке өтті. Сарапшылар зерттеу жүргізе келе нысанды бұзу қажеттігін анықтады. Осыған байланысты Шымкент қаласы әкімдігі «Сәби» қорының қолдауымен сарайды бұзып, орнына жаңа мәдениет сарайын салу туралы шешім қабылдады.
Қала әкімі қатысушыларды маңызы зор құрылыстың басталуымен құттықтап, «Фосфоршылар мәдениет сарайы» ұзақ уақыт бойы қаланың мәдени орталығы болғанын атап өтті. Мамандар тарапынан жүргізілген зерттеу жұмыстары негізінде құрылысты қайта жаңғыртуға шешім қабылданып, бұл бастамаға «Сәби» қорының негізін қалаушылар қолдау көрсетті.
– Шымкенттің бай тарихы мен бірегей мәдени мұрасы бар. Қалада экономикалық өсуімге, инфрақұрылымды дамытуға және тұрғындардың өмір сүру сапасын жақсартуға ерекше назар аударылып, мегаполис жалпы барлық бағыттар бойынша қарқынды дамып келеді. Бұл нысанның құрылысы болашаққа жасалған маңызды инвестиция болмақ. Жаңа мәдениет сарайы қаланың дамуына серпін беретін жаңа мәдени орталыққа айналады, – деді Ғ.Сыздықбеков.
«Сәби» қоры 23 жылдан бері медицина, білім және мәдениет салаларында кешенді зерттеулерге негізделген жобаларды жүйелі түрде қолдап келеді. Шымкенттегі маңызды нысанды қайта жаңғыртпас бұрын, қор «Шымкент және «Фосфоршылар мәдениет сарайы»: дәстүр, модерн және даму нүктелері» атты зерттеу жүргізіп, қала тұрғындарының әлеуметтік дағдыларды дамыту және ұрпақтар сабақтастығын қамтамасыз ету қажеттілігін анықтады.
– Жаңа “Фосфоршылар мәдениет сарайы” – Шымкенттің мәдени дамуының жаңа кезеңі. Бұл тек жаңа дағдыларды меңгеруге мүмкіндік беретін білім беру орталығы ғана емес, сонымен қатар, әр жастағы тұрғындарды біріктіретін қоғамдық кеңістік болады. Даму тұжырымдамасында ұрпақтар арасындағы мәдени байланысты нығайту мен дәстүрлерді сақтауға ерекше мән бердік, – деді Әсел Тасмағамбетова.
Жаңа мәдениет сарайы бірнеше бағытты қамтитын көпсалалы орталық болмақ. Мұнда IT-хаб, креативті хаб және қоғамдық бастамалар хабы жұмыс істейді. Қала тұрғындары үшін креативті индустрия алаңдары, суретшілер шеберханасы, көрме залы, амфитеатр, коворкинг, кеңсе бөлмелері, форум алаңы, сән көрсетіліміне арналған трансформер-сахна, бизнес-инкубатор, фото және видеостудия, дыбыс жазу студиясы, подкаст алаңы, конференц-зал, сондай-ақ, экологиялық бастамалар мен ата-аналар клубтары секілді қалалық қауымдастықтардың филиалдары қолжетімді болады. Сондай-ақ, болашаққа қажетті дағдыларды дамытуға ерекше көңіл бөлінеді. Атап айтқанда, IT-модельдеу және робототехника, тұрмыстық шаруашылық, руникалық жазу, домбыра тарту, шахмат, бассейн, үлкен теннис, футбол, күрес, көркем гимнастика, жаттығу залы мен би сабақтары ұйымдастырылады.
«Сәби» қорының тапсырысы бойынша жаңа мәдениет сарайының дизайны әзірленді. Жобада Шымкентке тән тарихи және заманауи элементтер үйлестіріледі. Жаңғырту жоспарына сәйкес, нысан маңындағы аумақ та кешенді түрде абаттандырылады. Мұнда саябақ алаңдары, аллеялар, субұрқақтар және заманауи балалар алаңдары салынып, қала тұрғындары мен қонақтары үшін жайлы кеңістік жасалады.
