Шымкенттік кәсіпкер Рабиға Байтемірова - отандық балалар ойыншығын шығарумен айналысады. Кәсіпорын «Navruz Plastik – ShR» сауда маркасымен Қазақстан нарығында кеңінен танылған, деп хабарлайды Shymkentaqparat

Балалар ойыншығын құрастыруды неліктен қолға алғаны жөнінде кәсіпкердің өзі айтып берді.

- 1995 жылдары жұбайым екеуміз Қытай, Иран, Ресей және Өзбекстан елдерінен түрлі тауарлар әкеліп сатып жүрдік. Сонда балалар ойыншығына деген сұраныстың жоғары екенін байқадық. Саудамен ұзақ жылдар бойы айналысқандықтан, нарықты зерттеп, ойыншық өндірісімен айналысуға бел будық. Сол уақытта ұлым Қытайда оқитын және құрал-жабдықтарды, өндірістік, технологиялық процестермен бізді таныстырды. Нәтижесінде 2013 жылы қажетті жабдықтарды алып, «Маг» ойыншықтары желісін жинақтақтауды бастап кеттік. Ал 2015 жылы ойыншықтар ассортиментін кеңейту үшін пресс-қалыптар, қосымша құрал-жабдықтар шығаратын машина жабдығы, балаларға арналған квадроциклдарды сатып алу қажеттігі туды. Бұл мақсатта мемлекеттік бағдарлама шеңберінде «Даму» қоры несие алуға көмек көрсетті. Осылайша ойымыз жүзеге асты. Алдағы уақытта басқару құрылғысы бар көлік ойыншықтар, қуыршақтар және балаларға арналған ыдыс-аяқтар жасап, экспортқа шығарсақ деген жоспарымыз бар,- дейді Рабиға Байтемірова.

Бүгінгі таңда кәсіпорын мотоцикл, тұлпар ойыншықатыр мен құрастырғыштар шығарады. Айына 4 000-6 000 дана ойыншық өндіруге қауқарлы. Кәсіпорын 20 адамды тұрақты жұмыспен қамтып отыр.

Отандық ойыншықтарды республикамыздың барлық өңіріндегі дүкендерден қолжетімді бағада кездестіре аламыз. Сонымен бірге, Қырғызстан еліне де жолданады. Түркия және Иран инвесторлары қызығушылық танытып, бірлесе жұмыс жасауды ұсынып отыр.

Өнім өндіруде полипропилен мен полиэтилен секілді шикізатты Иран, Түрікмен елінен алдырса, бояулары Вьетнам және Германия, Кореядан әкелінеді.