Шымкент дәрігерлері денесінің 92 пайызын күйік шалған қызылордалық тұрғынды аман алып қалды, деп хабарлайды Shymkentaqparat

Қызылорда облысының тұрғыны Әлішер Қадырхан 2020 жылдың 14 қарашасы күні Шымкенттегі Т.Орынбаев атындағы гипербариялық оксигенация орталығына ауыр халде жеткізілген. Дәрігерлер науқастың денесінің 92 пайызы күйік шалғанын анықтап, «термиялық күйік» диагнозымен жансақтау бөліміне жатқызды.

Екі айға жуық ем алған 26 жастағы Әлішер аман қалып, емі оң нәтиже берді. Қазір науқастың жағдайы жақсы.

«Науқас Қызылорда облысынан жедел жәрдеммен жеткізілді. Жағдайының ауырлығына байланысты науқасқа шұғыл түрде реанимациялық көмек көрсетілді. Жансақтау бөлімінде жағдайы жақсарған соң, палатаға ауыстырып, денесінің күйік шалған жері жазылды», - дейді күйік бөлімінің меңгерушісі Мұхит Досыбаев.

Әлішердің сөзінше, үйде газ балоны жарылып, денесін толығымен күйік шалған. Науқастың өзі әу баста аман қалуына күмәнмен қарағанын жасырмайды.

«Ауруханаға түскенде аман қалуым екі талай деп ойладым. Қорқынышты ойлар мазалады. Құдайға шүкір, ол күндер артта қалды. Дәрігерлерге мың алғыс айтамын», - дейді қызылордалық тұрғын.