«Асар» шағынауданындағы қалалық клиникалық балалар ауруханасы тағы да жаңа бөлімшемен толықты. Тәуелсіздіктің 30 жылдығы қарсаңында ауруханада 20 төсек орынға лайықталған онконефрогематология бөлімшесі ашылды. Бұл туралы қалалық денсаулық сақтау басқармасы хабарлады.

Бұған дейін онкогематология патологиясы бар науқас балалар Нұр-Сұлтан, Алматы, Түркістан облысындағы ауурханада ем алатын. Енді ондай диагнозы бар пациенттер ем іздеп алысқа сабылмайды. Жаңадан ашылған онконефрогематология бөлімшесі 20 төсек орынға лайықталған. Мұнда жұмыс істейтін мамандар біліктілігін арттырып, арнайы оқытудан өткен. Сондай-ақ науқастарға нақты диагноз қойып, емдеу шараларын жүргізу үшін мединацалық ұйым ішінде диагностикалық зертхана жұмыс істейді.

Айта кетейік, Асардағы клиникалық балалар ауруханасы 18 жасқа дейінгі балаларға тәулік бойы медициналық көмек көрсететін көп бейінді емдеу мекемесі. Жыл сайын емдеу мекемесінде қызмет сапасы жақсарып, медициналық қызмет түрі артуда. Соңғы бір жылдың өзінде мұнда нейрохирургиялық, күйік, урологиялық, торакалды хирургия, эндокринологиялық, нейрохирургиялық медициналық оңалту сияқты төсектердің жаңа бейіндері ашылған.