Шымкент қаласының әкімі Мұрат Әйтеновтің төрағалығымен Қазақстан Халықтар Ассамблеясының құрылымдары және қалалық этномәдени бірлестіктерінің төрағаларымен кездесу жиыны өтті, – деп хабарлайды shymkentaqparat.kz

Қаладағы мемлекеттік этносаясаттың жүргізілу барысымен танысып, қатысушылардың ұсыныс, пікірлерін тыңдаған шаһар басшысы алдағы кезеңдерде қаланың өсіп-өркендеу жолындағы жұмыстарды бірлесе жүзеге асыратынын жеткізді.

–Қазақстан Халықтар Ассамблеясы Елбасы Нұрсұлтан Әбішұлының тікелей бастамасымен құрылған болатын. Міне, содан бері ширек ғасыр уақыт өтті. Талай қиын-қыстау күндерде бүтін бір ұлт болып ұйысып, бір жеңнен қол, бір жағадан бас шығарып, елдің татулығы жолында аянбай еңбек етіп келесіздер. Елдің мызғымас бірлігі – тәуелсіздігіміздің кепілі, - деді қала әкімі.

Кездесуде қаладағы этносаралық ахуал және қоғамдық келісім мен жалпыұлттық бірлікті нығайту бойынша атқарылған жұмыстар жөнінде «Қоғамдық келісім» мекемесінің басшысы Ербол Байқонақов баяндады.

– Пандемия ахуалындағы шектеулерді ескере отырып, жұмыс ауқымын онлайн-форматта жүргізуге басымдық берілді. Мемлекет басшысының «Халық үніне құлақ асатын мемлекет» қағидаты аясында қоғамдық диалог алаңдары құрылды. Сонымен қатар, карантин кезеңінде этнос өкілдерінің қатысуымен «Абай оқулары» эстафетасы, «әл-Фараби тағылымы» танымдық акциясы, «Мен Туыммен мақтанамын» челленджі, «Қаламның тарихи орындары» онлайн-саяхаты, «Мемлекеттік тіл – тұғырым» вебинары, «Елбасы жолымен» танымдық экспедициясы, «Тәуелсіздік табыстары» лекциялары ұйымдастырылды, - деді Е.Байқонақов.

Ербол Сүлейменұлының мәлімдеуінше, қазіргі таңда миллионды шаһардың ұлттық құрамында қазақтар 66,7%, өзбек 17,7%, орыс 9,1%, өзге этностар 6,5 пайызды құрап отыр. Қалада жыл сайын әр этномәдени бірлестік өзінің тілі мен мәдениеті және дәстүрі күндерін атап өтеді.

Айта кетейік, бүгінде Шымкент қаласында 100-ден астам түрлі этнос өкілдері алаңсыз еңбек етіп, өзара тату-тәтті өмір сүріп жатыр. Ал Қазақстан Халқы Ассамблеясының қарамағында 16 этномәдени бірлестігі жұмыс істейді. Қаладағы орта арнаулы оқу орындарында 29 «Достық» клубы ашылған.