Құралайды көзге атқан шымкенттік мергендеріміз Үндістандағы әлем кубогында 4 медалді қоржындады, деп хабарлайды Shymkentaqparat

Жерлестеріміз 1 алтын, 2 күміс және 1 қола жүлделерді иемденді.
⠀

18-29 наурыз аралығында Үндістанның Нью-Дели қаласында Стенд және оқ атудан рейтингтік әлем кубогы өтіп жатыр. Бұл тартысты жарысқа әлемнің 53 елінен 300-ге жуық мерген спортшылар қатысуда.

⠀
21-ші наурызда әйелдер арасында өткен «SKEET» жаттығуында Қазақстандық спортшы қызымыз Кравченко Зоя 114 ұпай санымен 5-ші болып финалға еніп, тартысты сәтте бір ғана нысанды мүлт жіберіп, Ұлыбритания спортшысы Хилл Емберге жол берді. Кравченко Зоя күміс медал жеңіп алды .

Ал 22-ші наурызда командалық есепте Кравченко Зоя, Насырова Рината және Панарина Ольга 327 ұпаймен финалға екінші болып келіп, байрақты бесекеде алаң иелері Үндістанның әйелдер құрама командасын тізе бүктіріп, алтын медалді қанжығалады.
⠀
22 наурызда ерлер арасында өткен додада спортшы жігіттеріміз командалық есепте Почивалов Давид (Шымкент қ.), Ещенко Эдуард (Алматы қ.) және Мухамедиев Александр (Шымкент қ.) 501 ұпаймен финалға еніп, қола медалға қол жеткізді.
⠀
23-ші наурызда Қазақстандық 1-ші аралас құрама командасы командалық есепте Панарина Ольга (Шымкент қ.) мен Ещенко Александр (Алматы қ.) 140 ұпаймен финалға екінші болып өтіп, тартысты сайыста күмістен алқа тақты.
⠀
Айта кетейік, 23-ші наурызда өткен әлем кубогының медалдық нәтижелері бойынша, Қазақстан құрамасы 3-ші орында болса, 2-ші орында АҚШ, алаң иелері Үндістан құрама командасы көш бастап тұр.
⠀