Шымкенттік математиктер IYMC 2020 халықаралық сайысының жүлдегерлері атанды, – деп хабарлайды shymkentaqparat.kz.

Дәстүрлі түрде өтетін тәуелсіз ұйымның биылғы байқауына әлемнің 93 елінен мыңдаған оқушылар мен студенттер қатысты. Ой жарысынан озық шыққан шымкенттік оқушылар «Gold Honour» және «National award» жүлделерімен марапатталды.

Жоғары нәтиже көрсеткен Шерзод Мухтаров пен Алмас Рыспаев - қаламыздағы физика-математика бағытындағы Назарбаев Зияткерлік мектебінің оқушылары. Сайыс ережесіне сәйкес 1 сағат көлемінде шешілуі тиіс 30 есептің бірі 25-ін шығарса, бірі 23-нің дұрыс жауабын тапқан.

Жарыс қорытындысы бойынша екі оқушы да қатысушылар ішінен ең үздік нәтиже көрсеткендердің қатарында болды. Сондай-ақ, Шерзод Мухтаров Қазақстаннан қатысқан барлық жастардың арасында ең жоғарғы көрсеткішке ие болып, арнайы «National award» жүлдесімен марапатталды.

Айта кетейік, International Youth Math Challenge (IYMC) – бұл жастарға өздерінің математикалық дағдыларын дәлелдеуге және шығармашылық әлеуетін ашуға мүмкіндік беретін жыл сайын өткізіліп тұратын халықаралық математика сайысы.